 |
| सिल्लोड : उपविभागीय कृषी अधिकारी यांना निवेदन देताना भाजपचे पदाधिकारी |
सिल्लोड : सिल्लोड-सोयगाव तालुक्यात युरिया त्वरित उपलब्ध करावा नसता कृषी अधिकाऱ्यांना तालुक्यात फिरू देणार नाही असा इशारा उपविभागीय कृषी अधिकारी यांना शुक्रवारी (ता.१०) निवेदनाद्वारे दिला.
सिल्लोड- सोयगाव दोन्ही तालुक्यात यावर्षी चांगला पाऊस पडला असुन खरीप पीक अत्यंत चांगले आलेले आहे परंतु युरिया खताच्या टंचाईमुळे दोन्ही तालुक्यातील शेतकरी हवालदिल झाले आहेत. आज रोजीपर्यंत तालुक्यात कुठेही युरिया शिल्लक नाही. कोणत्याही दुकानात युरिया उपलब्ध नसल्यामुळे शेतात आलेले चांगले पीक हातातून जाण्याची शक्यता निर्माण झाली आहे.
सिल्लोड तालुक्यातील युरियाची मागणी १७ हजार ५०० टन इतकी आहे. मात्र आज रोजी सिल्लोड तालुक्यात फक्त सहा हजार टन इतकाच युरिया आलेला आहे. उर्वरित ११ हजार ५०० टन युरियाची गरज आहे तर सोयगाव तालुक्यातील युरियाची मागणी चार टन इतकी असताना आतापर्यंत सोयगाव तालुक्यात केवळ एक हजार टन युरिया आलेला आहे. उर्वरित तीन हजार टन युरियाची गरज आहे. दोन्ही तालुक्यात १४ हजार ५०० टन युरियाची गरज आहे. तरी त्वरित आपल्या स्तरावर युरिया उपलब्ध करण्यासाठी कार्यवाही करावी अन्यथा कृषी विभागाच्या कोणत्याही अधिकाऱ्याला भाजपा कार्यकर्ते दोन्ही तालुक्यात फिरू देणार नाही असा इशारा निवेदनात दिला आहे.
या निवेदनावर भाजपा प्रदेश चिटणीस इद्रिस मुलतानी प्रदेश कार्यकारिणी सदस्य सुरेश बनकर, तालुकाध्यक्ष ज्ञानेश्वर मोठे, गणेश लोखंडे, भाजयुमो प्रदेश उपाध्यक्ष सुनिल मिरकर, किसान मोर्चा प्रदेश सरचिटणीस मकरंद कोर्डे, तालुकाध्यक्ष पुंजाराम गरुड, जयप्रकाश चव्हाण, शिवाजी बुढाळ, शहराध्यक्ष कमलेश कटारिया, तालुका सरचिटणीस किरण पवार, राजेंद्र दांडगे, नारायण खोमणे, भाजयुमो तालुकाध्यक्ष किशोर गवळे, जिल्हा उपाध्यक्ष विजय वानखेडे, भाजपा अनुसूचित जाती मोर्चा अध्यक्ष दिलीप गवळी आदींच्या स्वाक्षऱ्या आहेत.
शासनाने शेतकऱ्यांना बांधावर खत देण्याची घोषणा केली मात्र दोन्ही तालुक्यातील शेतकऱ्यांना बांधावर खत तर सोडा दुकानात सुद्धा खताचा तुटवडा निर्माण झाला आहे. जर बांधावर खत दिले असेल तर त्या शेतकऱ्यांची नावे द्या : इद्रिस मुलतानी, प्रदेश चिटणीस भाजपा
